Plantun de Prouvènço

Pèr coumpara dos planto d'encò nostre

Carex pendula & Scleranthus annuus

Queirello(-pendènto)

Carex pendula

Cyperaceae

Àutri noum : Moutouso, Sagneto.

Noms en français : Laîche pendante, Laiche à épis pendants.

Descripcioun :
Aquéu grando queirello se vèi en ribo d'aigo e dins li bos umide. Es uno planto forto que trachis en mato emé de fueio bèn verto dessubre (un pau verdalo dessouto), de 7 à 15 mm de larjo. Se recounèis eisadamen à si lónguis espigo que pendoulo, emé uno masclo e douas à cinq femèu.

Usanço :
N'i'a que la planton dins li jardin.

Port : Grando erbo
Taio : 0,5 à 1,8 m
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Carex
Famiho : Cyperaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 5 à 20 cm
Flourido : Printèms - Estiéu

Sòu : Si-Ca
Autour basso e auto : 0 à 1300 m
Aparado : Noun
Abriéu à juliet

Liò : Ribiero - Aigo - Roubino
Estànci : Termoumediterran à Mountagnard
Couroulougi : Éurasiatico
Ref. sc. : Carex pendula Huds., 1762

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.